കടല്‍

കടല്‍ക്കരയില്‍ നില്‍ക്കുമ്പോള്‍
വന്‍കരയുടെ അരികുതൊടുന്നു
ഇവിടെനിന്നു നിന്റെ സ്വപ്നത്തിലേക്ക്
ഞാനീ കാറ്റിരമ്പത്തെ
പറഞ്ഞയക്കാം.

ഉടലോളം ഉയരുന്ന തിരയുടെ
ആരവം നീ കേള്‍ക്കുക.

യാത്രക്കിടയില്‍
ഓര്‍മ്മയുടെ തുരുത്തില്‍
ഒരു ചീനവല കണ്ടു.

കടലിനപ്പുറം
ലോകത്തിന്റെ മറുകര
നേര്‍രേഖയാണ്.
കാറ്റില്‍ എത്തുന്ന
ശുഭസന്ദേശങ്ങളില്‍
സുഹൃത്തിന്റെ റോസ് ഗാര്‍ഡനിലെ
പൂക്കളുടെ മണം.

മുന്നില്‍ കടലാണ്
ഒരിക്കലുമവസാനിക്കാത്ത
കാഴ്ചകളുടെ
കടല്‍.

തിരിച്ചുപോക്ക്
ആഗ്രഹിക്കാത്തവന്
സ്വപ്നം തരും
കടല്‍.

ഇപ്പോള്‍ മഴ

ഇപ്പോള്‍ മഴ
ജാലകത്തിനപ്പുറം
പെയ്തിറങ്ങുന്നത്
ഓര്‍മ്മയിലെ മഴചില്ല്.
ഇലത്തുമ്പില്‍നിന്നു
ഭൂമിയിലേക്ക്,
പിന്നെ
പാത നിറയുന്നത്
പ്രളയജലത്തിന്റെ നേര്‍രേഖ.
മിന്നലിന്റെ സൂര്യപ്രഭ
ഇടിമുഴക്കത്തിനും മുമ്പെ...
പിന്നിലാകുന്നതിന്റെ രോഷം
ഗര്‍ജ്ജനത്തില്‍.
ഉറക്കത്തിന്റെ പാതിവഴിയില്‍
പെയ്തു നിറയുന്നത്
ഓര്‍മയിലെ ഒഴിവുകാലം.